AFP yatangaje ko kuri uyu wa Mbere tariki 7 Ukwakira 2019, Perezida wa Repubulika Iharanira Demokarasi ya Congo, Félix Tshisekedi ubwo yari i Bukavu mu Ntara ya Kivu y’Amajyepfo afungura Laboratwari ipima umusaruro w’ibikomoka ku buhinzi, yatangarije abaturage ko yiteguye no kuba yapfira mu rugamba rwo kugarura umuteno muri ako gace.
Ati “Urugamba rwacu ruzaba ari urwo kugarura amahoro, amahoro asesuye, amahoro akenewe ku mutekano w’igihugu cyacu. Muri urwo rugamba munyizere, niteguye no kuba napfa kugira ngo agerweho.”
Ubwo yiyamamarizaga kuyobora RDC umwaka ushize, Perezida Tshisekedi yavuze ko azanashyira ibirindiro bya Gisirikare mu Burasirazuba bwa Congo mu rwego rwo guhangana n’imitwe y’inyeshyamba imaze igihe ishinzeyo ibirindiro, igatera umutekano mucye mu Karere icyo gihugu giherereyemo.
Imitwe y’iterabwoba n’inyeshyamba irwanira mu burasirazuba bwa RDC irimo FDLR igizwe na bamwe mu bagize uruhare muri Jenoside yakorewe abatutsi n’iyindi, yakunze gushyirwa mu majwi guhungabanya umutekano w’Akarere no kuba ibikorwa ikorwa yifashisha amafaranga ikura mu bucukuzi bw’amabuye y’agaciro y’iki gihugu butemewe.
Twabibutsa ko mu Burasirazuba bwa Repubulika Iharanira Demokarasi ya Congo ari agace kamaze imyaka irenga 25 karahindutse indiri y’inyeshyamba n’imitwe y’iterabwoba ariko nako bakora ibikorwa byo guhohotera ku buryo bukabije abahatuye.
TUYISHIME Eric
